Siðareglur skotveiðimanna

Upplýsingar fengnar af vef SKOTVÍS

Félagar í Skotveiðifélagi Íslands eru samþykkir eftirfarandi skilgreiningu á skotveiðum sem útilífsíþrótt:

Skotveiðimaður stundar veiði á villibráð sér til ánægju og heilsubótar. Hann virðir landslög og vegna byssunnar ber hann sérstaka ábyrgð gagnvart samborgurum sínum og lífríki landsins í heild. Þess vegna temur hann sér eftirfarandi siðareglur.

SKOTVEIÐIMAÐUR…

1. EYKUR STÖÐUGT ÞEKKINGU SÍNA Á SKOTVEIÐUM.
Hér er meðal annars átt við:

  • Lög og reglur um veiðar, bráðina og lifnaðarhætti hennar.
  • Útlit og útbreiðslu friðaðra fugla.
  • Verndun veiðidýrastofna og skynsamlega nýtingu þeirra.
  • Eiginleika veiðivopna og skotfæra og annmarka þeirra.

2. ÆFIR SKOTFIMI
Skotveiðimaður þarfnast stöðugrar æfingar hvort heldur hann ætlar að skjóta kyrrstæða bráð eða fugl á flugi.

  • Nota skal hvert tækifæri til markæfinga, bæði á kyrrstæð mörk og leirdúfum.
  • Leggja skal sérstaka áherslu á að þjálfa fjarlægðaskyn.


3. GÆTIR FYLLSTA ÖRYGGIS Í MEÐFERÐ SKOTVOPNA

  • Ávallt skal meðhöndla skotvopn sem hlaðið væri.

– Beindu aldrei hlaupinu að neinum.
– Notaðu aldrei byssuna sem barefli eða göngustaf.
– Leggðu aldrei byssuna þannig að hún geti dottið.
– Geymdu byssu og skotfæri tryggilega.

  • Byssu skal ekki hlaða fyrr en veiðimaður er reiðubúinn að skjóta. Taktu skotin úr byssunni þegar:

– þú ferð inn í bíl eða annað faratæki
– þú færir þig að ráði um set
– þú átt leið um hálku
– þú ferð yfir girðingar eða torleiði
– þú leggur byssuna frá þér

  • Gengið skal úr skugga um að ekkert beri á þegar miðað er og skotið á bráðina.

– Gáðu að veiðifélögunum.
– Gættu þess að fólk, búpeningur og faratæki, hús eða önnur mannvirki séu ekki í hættu fyrir skotinu.
– Gættu þess að skotið getur hrokkið af grjóti, frosnum sverði eða vatnsfleti.
– Sé þess kostur, hagaðu svo til að bráðin beri í holt eða hæð, sem tekur geti við skotinu ef það stöðvast ekki í bráðinni.

  • Veiðimaður losar ekki öryggi af byssu og skýtur ekki fyrr en hann hefur fullvissað sig um að skotmarkið sé það sem hann ætlar að skjóta á.
  • Veiðimaður skal ekki snerta byssu ef hann er undir áhrifum áfengis eða annarra vímugjafa.


4. BEITIR EKKI VEIÐIAÐFERÐUM SEM VEITIR BRÁÐINNI ÓÞARFA KVÖLUM

  • Skot á að deyða bráðina á augabragði. Til þess að komast hjá því að særa dýr skaltu gæta þess að:

– skjóta ekki af of löngu færi
– ekkert beri milli þín og bráðarinnar
– skjóta ekki nema yfirgnæfandi líkur séu að því að hitta vel

  • Sært veiðidýr skal aflífa hið skjótasta. Finnist dýrið ekki á skotstað, skal einskis látið ófreistað að leita það uppi.


5. TELUR FJÖLDA VEIDDRA DÝRA EKKI MÆLIKVARÐA Á GÓÐAN VEIÐIMANN, EÐA VEL HEPPNAÐAN VEIÐIDAG

  • Veiðimaður stærir sig ekki af feng sínum og keppir ekki við aðra um fjölda veiddra dýra.
  • Þá er veiðidagur góður þegar hóflega er veitt, með talsverðri líkamlegri áreynslu, vakandi náttúruskyni og sært dýr liggur ekki eftir að kveldi.


6. FER VEL MEÐ VEIÐIBRÁÐ

  • Farðu vel með feng þinn og spilltu honum ekki.
  • Vandaðu aðgerð og tilreiðslu bráðar.

7. FÆRIR VEIÐIDAGBÆKUR AF KOSTGÆFNI OG TEKUR VIRKAN ÞÁTT Í VERNDUN VEIÐIDÝRA

  • Færa ber veiðibækur og halda þeim til haga. Veiðiskýrslur eru þýðingarmikil gögn við rannsóknir á veiðidýrum.
  • Veiðimaður ætti að leggja sitt af mörkum í baráttu gegn brotum á veiðilöggjöfinni.

8. ER GÓÐUR VEIÐIFÉLAGI

  • Veiðimaður skýtur ekki þegar veiðifélagi hans á von á betra færi.
  • Veiðimaður hjálpar veiðifélaga sínum að sækja feng og leita uppi særða bráð.


9. SÝNIR ÖÐRUM VEIÐIMÖNNUM HÁTTVÍSI

  • Er fús að veita upplýsingar um veiðarnar, sem gætu orðið þeim að gagni.
  • Hefur samráð við þá um nýtingu veiðisvæðisins.


10. VIRÐIR RÉTT LANDEIGANDA OG STENDUR VÖRÐ UM EIGIN RÉTT

  • Veiðimaður leitar heimildar landeiganda til veiða og ráðfærir sig við hann.
  • Veiðimaður fer með gát um ræktuð lönd, skemmir ekki girðingar og lokar hliðum á eftir sér.


11. SÝNIR ALMENNINGI TILLITSSEMI
Hafa ber í huga að margur er lítt hrifinn af skotveiðum og fellur illa að sjá dauð dýr.

  • Veiddu því ekki nærri fjölförnum vegum eða í grennd við mannabústaði.
  • Vertu vingjarnlegur við þá sem þú hittir í veiðiferðum.
  • Forðastu að flytja feng þannig að til ama geti orðið fyrir aðra.


12. GENGUR VEL UM LANDIÐ

  • Veiðimaður gerir greinarmun á bráð og öðrum dýrum þótt skjóta megi. Bráð er veidd, vargi er eytt, en önnur dýr látin í friði.
  • Veiðimaður spillir hvergi landi. Þess gætir hann við akstur, í tjaldstað og við meðferð elds.
  • Veiðimaður skilur ekki annað eftir sig en sporin sín.